ថៃ៖ ក្រុមការពារតំណែងជើងឯក AFF Championship ដំរីសឹកថៃ បានឈានឡើងដល់វគ្គផ្តាច់ព្រ័ត្រពានរង្វាន់ប្រចាំតំបន់ AFF Championship ២០២២ ដោយជួបជាមួយក្រុមជម្រើសជាតិវៀតណាម ក្រោយទម្លាក់ក្រុមជម្រើសជាតិម៉ាឡេស៊ី ដោយលទ្ធផល ៣-០ នៅកីឡដ្ឋាន Thammasat។

ក្រុមជម្រើសជាតិម៉ាឡេស៊ី កាលពីជើងទី១ បាននាំមុខក្រុមជម្រើសជាតិថៃដោយលទ្ធផល ១-០ នៅរាជធានីគូឡាឡាំពួរ ប៉ុន្តែចូលមកដល់ការប្រកួតជើងទីពីរ គ្រាប់បាល់របស់កីឡាករ Teerasil Dangda, Bordin Phala និង Adisak Kraison ជួយឱ្យក្រុមម្ចាស់ជើងឯក ៦សម័យនេះ ឈានឡើងដល់វគ្គផ្តាច់ព្រ័ត្រពាន AFF ជាលើកទី១០។

លទ្ធផលនេះមានន័យថា ក្រុមជម្រើសជាតិវៀតណាម នឹងទទួលស្វាគមន៍ក្រុមជម្រើសជាតិថៃមុន នៅថ្ងៃសុក្រ ទី១៣ ខែមករាខាងមុខនេះ នៅកីឡដ្ឋាន My Dinh មុននឹងធ្វើដំណើរទៅទឹកដីកីឡដ្ឋាន Thammasat របស់ថៃ សម្រាប់ការប្រកួតជើងទី២ នៅរយៈពេលត្រឹម ៤ថ្ងៃបន្ទាប់។

គួររំឮកថា ក្រុមជម្រើសជាតិថៃ និងវៀតណាម បានជួបគ្នានាវគ្គផ្តាច់ព្រ័ត្រសាជាថ្មីម្តងទៀត ខណៈការជួបគ្នាចុងក្រោយបង្អស់នៅវគ្គផ្តាច់ព្រ័ត្រកាលពីឆ្នាំ២០០៨ ដែលកាលណោះវៀតណាមបានយកឈ្នះថៃ ក្នុងលទ្ធផលសរុបទាំងពីរជើង ៣-២ នឹងគ្រងជើងឯកជាលើកដំបូងក្នុងប្រវត្តិសាស្រ្តរបស់ខ្លួន៕